Дафтари матбуоти Додгоҳ рӯзи 19-уми август хабар дод, ки Лутфуллои Назирмад, Ҷумъахон Қурбонов, Ёқубҷон Юсуфзода ва Муҳаммад Шарифзода то 22-юми ноябри имсол дар Боздоштгоҳ мемонанд.

Мурофиа паси дарҳои баста гузашт. Тафсилоташ, аз ҷумла мавқеи гумонзадҳо маълум нест.

Аз ин пеш, рӯзи 16-уми август, Додгоҳи ноҳияи Басманний бо дархости Кумитаи тафтишоти Русия муҳлати ҳабси Муҳаммадсобир Файзов, Далерҷон Мирзоев, Муродалӣ Раҷабализода ва Шамсидини Фаридунро ҳам то 22-юми ноябр дароз кард.

Ин афрод аз моҳи марти имсол дар ҳабс ҳастанд.

Ҳамла ба "Крокус Сити Ҳолл" дар наздикии Маскав дар шаби 22-юми марти имсол сурат гирифт. Мақомоти Русия гуфтанд, дар ин ҳодиса 144 нафар ҷон бохта, беш аз 500 кас осеб диданд.

Гурӯҳи тундрави "Давлати исломӣ" ё ДОИШ масъулияти ҳамларо ба дӯш гирифт, вале баъзе аз мансабдорони Русия ангушти иттиҳомро ба тарафи Украина дароз карданд. Киев даст доштанашро дар ҳодиса инкор кард.

Додгоҳи ноҳияи Басманнийи шаҳри Маскав то кунун беш аз даҳ нафар, аз ҷумла шаҳрвандон ва зодагони Тоҷикистонро ба гумони даст доштан дар ҳамла ба “Крокус Сити” ба ҳабс гирифт. Шиканҷаи ошкори боздоштшудаҳо таҳқиқи мунсифонаи қазияро зери суол бурдааст.

Чанд шаҳрванди боздоштшудаи Тоҷикистон ба зидди қарори додгоҳ шикоят карда, худро расман бегуноҳ донистанд. Додгоҳ дархости онҳоро барои бозбинии парванда напазируфт

Муҳоҷирони тоҷик мегӯянд, пас аз ҳамла санҷишу боздошт ва ихроҷ афзуда, муносибати мардуму корфармоён бо онҳо дар Русия тағйир ёфтааст.

Шаҳрвандони боздоштшудаи Тоҷикистон, ки муҳлати ҳабсашон то моҳи ноябр дароз шуд:

МУҲАММАДСОБИР ФАЙЗОВ

Муҳаммадсобир Файзови 19-соларо рӯзи 23-юми марти имсол дар Русия дастгир карда, бо аробаи маъюбӣ ва либоси тиббӣ ба Додгоҳи ноҳияи Басманний оварданд. Пеш аз он дар шуъбаи эҳё буд ва бозпурсияш дар он ҷо гузашт. Ҳангоми амалиёти боздошт як чашмаш осеб дидааст.

Сайрам Файзова, модари Муҳаммадсобир Файзов, моҳи марти имсол ба Радиои Озодӣ гуфт, ҳеч бовараш намеояд, ки фарзандаш ҳамлаи террористӣ анҷом додааст. "Писарам шахси мазҳабӣ набуд, намозро ҳам соз намехонд, қазо мекард," -- нақл карда буд ӯ.

Дар аксу наворҳояш дар шабакаи иҷтимоии "ВКонтакте"-и русӣ Муҳаммадсобир Файзов гоҳе бо риш ва дар бархе маврид бидуни риш ҷавони шод ва коргари хуб тасвир ёфтааст. Аз миёни аксу наворҳои гузоштаи ӯ саҳнаҳое аз кораш бо муштариҳои рус, маҳалли кор, мошинсаворӣ ва наворҳои кӯтоҳ бо мусиқӣ низ дида мешаванд. Баъзе аз расонаҳои Русия нигоштанд, ки ӯ ба варзиш ҳам рағбат дошт ва дар толори варзишии War Pro дар Иваново дар дарсҳои кикбоксинг ширкат кардааст.

ДАЛЕРҶОН МИРЗОЕВ

Далерҷон Мирзоеви 32-сола аз деҳаи Галахонаи ноҳияи Рӯдакӣ рӯзи 23-юми марти имсол дар Брянск боздошт шуд. Дар наворе дар шабакаҳои иҷтимоӣ, ки иддао мешавад лаҳзаи боздошти Мирзоев аст, ӯро аз болои як дарахт ба поин фароварда, сипас ба дастонаш завлона мезананд.

Ба нақли наздиконаш, ӯ шаш моҳ пеш аз ҳодиса ба Русия рафта, дар хонаи амакбачааш дар Новосибирск мезист ва таксӣ меронд. Дар Тоҷикистон низ ба таксиронӣ машғул будааст.

Модараш, Гулракат Мирзоева, гуфта буд, ки бовар надорад, ӯ дар ҳодисаи террористӣ даст дошта бошад.

САИДАКРАМ РАҶАБАЛИЗОДА

Мақомоти Русия Саидакрам Раҷабализодаро рӯзи 23-юми март дастгир карда, дар аввал барои ду моҳ (то 22-юми май) ба ҳабс гирифта буданд. Ҳамсараш Бибисоро Ашӯрова ба Радиои Озодӣ гуфт, ӯ дар аввали моҳи январи имсол барои кор ба Русия рафт, аммо "тақрибан се моҳ на занг зад, на суроғ кард ва на пул фиристод".

Манобеи амниятии Туркия ба нашрияи “Ҳуррият”-и ин кишвар гуфта буданд, ки Саидакрам Раҷабализода 5-уми январи имсол вориди Истанбул шуда, 2-юми март якҷо бо Фаридуни Шамсиддин, гумонбари дигари ҳамла ба "Крокус", ба Русия рафт.

Саидакрам Раҷабализода то замони ба Русия рафтан дар корхонаи мебелсозӣ дар шаҳри Ваҳдат кор мекард. Ҳамсараш мегӯяд, "ӯ кӯшиш дошт як мошини “Опел” харида, дар ҳамин ҷо монад ва ба кораш идома диҳад.”

Ҳамдеҳагон ва ҳам наздиконаш гуфтанд, Раҷабализода намоз мехонд, аммо дар ягон ҷо таълими динӣ нагирифта буд. Бибисоро Ашӯрова мегӯяд, “мактаби миёнаро то синфи 9-ум хондааст. Дигар дар ягонҷо таҳсил накарда набуд. Гоҳ намоз мехонд, гоҳ намехонд.”

ФАРИДУНИ ШАМСИДДИН

Мақомоти Русия мегӯянд, номи Фаридуни Шамсиддини 25-сола дар "рӯйхати террористон ва ифротгароён" дар ин кишвар сабт шудааст. Аз шаҳри Ҳисор аст. Рӯзи 23-юми март дастгир карданд.

Дар навори бозпурсии мақомоти Русия Фаридуни Шамсиддин дар ҳоле ки дастонаш баста ва дар замин ба зону зада буд, гуфт, барои иҷрои ҳамлаи террористӣ аз ёвари як рӯҳонӣ “500 ҳазор рубл” гирифт. Баъзе аз корбарони шабакаҳои иҷтимоӣ ва коршиносон ба дурустии он шубҳа карданд.

Шабакаҳои русӣ дар Телеграм рӯзи 23-юми март акси шиканҷа шудани ӯро бо барқ нашр карданд. Бахши русии Радиои Озодӣ дар як таҳқиқот бо такя ба саҳифаҳои Фаридуни Шамсиддин дар шабакаҳои маҷозӣ маълум кардааст, ки ӯ чанд аксе аз ҳузураш дар Истанбули Туркия нашр карда ва номашро дар бархе шабакаҳои маҷозӣ Абдулло гузоштааст.

Фаридуни Шамсиддини дар соли 2014, замони таҳсил дар синфи 7-уми як мактаби миёнаи Ҳисор бо гумони озори ҷинсии ноболиғи 6-сола боздошт ва шаш сол зиндонӣ шудааст. Соли 2020 аз зиндон раҳо ва пас аз ду сол оиладор шуд. Ҳоло як тифли даҳмоҳа дорад. То рафтан ба Русия дар шаҳри Ҳисор дар нонвойхонае кор мекардааст.

Хешовандони Фаридуни Шамсиддин дар деҳаи Лойоба мегӯянд, пас аз раҳо шудани аз зиндон дар рафтору кирдори ӯ амалкардҳои ғайриинтизореро мушоҳида накарда буданд.

ЛУТФУЛЛОИ НАЗРИМАД

Мақомоти тафтишотии Русия алайҳи ин шаҳрванди Тоҷикистон бар асоси моддаи "анҷоми амали террористӣ дар ҳайати гурӯҳи созмонёфта, ки боиси марги инсон шудааст" парванда боз кардаанд.

Баъзе аз расонаҳои Русия қаблан навишта буданд, ки ӯ як рӯз баъди ҳамла дар "Крокус Сити Ҳолл"-и Маскав барои дағалӣ бо полис боздошт ва дертар гуё рабт доштанаш ба ҳодиса собит шудааст. Азбаски он замон мурофиа паси дарҳои баста гузашта буд, мавқеи худаш маълум набуд. Дар зодгоҳаш ба дурустии он шубҳа доранд.

Хабарнигорони Радиои Озодӣ барои суҳбат бо наздикони Лутфуллои Назримад ба ноҳияи Панҷ рафтанд, аммо онҳоро наёфтанд. Ҳамсояҳои ин ҷавон гуфтанд, ӯ мактабро бо баҳои аъло хатм кардааст ва ба иттиҳоми эълоншуда нисбат ба ӯ дар Русия бовар надоранд. Вай тобистони соли гузашта Донишгоҳи шаҳри Бохтарро хатм карда, барои ҷустуҷӯйи кор ба Русия рафтааст.

Лутфуллои Назримад фарзанди калонии Назримад Ҳаётов, корманди идоари фарҳанги ноҳияи Панҷи вилояти Хатлон, будааст. Ба гуфтаи наздиконаш, падари хонадон ӯро барои кор ба Русия фиристода буд, то бо мадади писараш соҳиби манзил шаванд.

ҶУМЪАХОН ҚУРБОНОВ

Ҷумъахон Қурбонови 21-сола рӯзи 27-уми апрел бо қарори додгоҳи Басманнии шаҳри Маскав ва ба гумони “маблағгузорӣ барои омодагӣ ба ҳамлаи террористӣ” ба ҳабс гирифта шуд.

Манзили волидони Ҷумъахон Қурбонов дар ҷамоати Хуросони ноҳияи Фархори вилояти Хатлон ҷойгир аст. Модараш омӯзгор аст, падараш деҳқонӣ мекунад. "Бо саводи худаш ба Донишгоҳи омӯзгорӣ дар Душанбе дохил шуда буд. Зӯрамон нарасид, ки пули иҷора ва харҷҳои дигарашро диҳем. Ночор барои пулкоркунӣ ба Русия рафт," – нақл кард Бегиёр Саидов, падари Ҷумъахон, рӯзи 6-уми май ба Радиои Озодӣ.

Ӯ афзуд, Ҷумъахон ҳамроҳи бародараш, Сӯҳроб Қурбонов, дар як макон дар пойтахти Русия зиндагӣ ва дар сохтмон кор мекарданд. Ҳар моҳ барои харҷи оила то 20 ҳазор рубли русӣ ё зиёда аз дусад доллари амрикоӣ мефиристодааст. "Ман ба бегуноҳии фарзандам бовар дорам," -- гуфт Саидов ва афзуд, “ба иттиҳоми эълонкардаи мақомот дар Русия бовар надорем. Пайваста насиҳаташ мекардам, ки танҳо ба роҳи рост рав.”

ЁҚУБҶОН ЮСУФЗОДА

Кумитаи тафтишотии Русия Ёқубҷон Юсуфзодаро ба он муттаҳам кард, ки чанд рӯз пеш аз ҳамла барои таъмини гумонбарон бо ҷой "тавассути корти бонкӣ ба як шарикаш пул фиристодааст".

Муфаттишон гуфтаанд, як қисми пул "баъд аз содир шудани ҷиноят ба ҳисоби яке аз ҳамлаварон гузаронда шуд." Тасдиқи он аз манобеи дигар имконпазир нест. Назари худаш ё наздикону вакили мудофеъ ва ҷузъиёти парванда дастрас нест.

Саҳифаи "Маш" дар Телеграм нигоштааст, ки Ёқубҷон Юсуфзода ҳангоми амалиёти “Нелегал” ва тасодуфан рӯзи 26-уми март дастгир шуда, сипас робитааш бо ҳамлаварон ошкор гаштааст.

Ба иттилои дарёфтии Радиои Озодӣ, Ёқубҷон Юсуфзода 25 сол дорад, оиладор ва соҳиби се фарзанд. Ҳангоми боздошт дар сохтмон кор мекардааст.

МУҲАММАД ШАРИФЗОДА

Додгоҳи ноҳияи Басманнии шаҳри Маскав рӯзи 5-уми апрел дастури ҳабси Муҳаммад Шарифзодаро содир кард. Ӯ ба "амали террористӣ" муттаҳам аст, вале ба сабаби пӯшида будани мурофиа назари ӯ ё вакили мудофеаш дастрас нест.

Русия мехоҳад, ихроҷу истирдоди шаҳрвандони хориҷиеро, ки бо Вазорати дифои ин кишвар қарордод баста, дар ҷанги зидди Украина ширкат доранд, манъ кунад.

Кумисюни ҳукуматӣ оид ба қонунгузорӣ тарҳи қонунеро дар ин бора таҳия карда, ба Думаи давлатӣ фиристодааст. Эҳтимол Маскав ният дорад, бо ин роҳ хориҷиёни бештареро барои артиш ва сафарбарӣ ба ҷанг ҷалб кунад.

Тибқи ин тарҳ, ҳамчунин ба хориҷиён дар гирифтани ҳаққи иқомат, иҷозатномаи кор ва иҷозаи вуруд ба Русия набояд посухи рад дода шавад.

Ин санад истирдоди ширкатдорони ҷанг дар Украинаро барои адои ҷазо ба кишварҳои худашон низ манъ мекунад. Тасмими манъи интиқоли сарбозони қарордодӣ ба давлатҳои дигар ба ҳазорҳо муҳоҷири корӣ аз Осиёи Марказӣ рабт мегирад, ки аз тарафи Русия ба ҷанги Украина сафарбар шудаанд.

Қонун дар аксари кишварҳои Осиёи Марказӣ, ширкати шаҳрвандон дар низоъҳои хориҷиро манъ ва ҷазо пешбинӣ кардааст. Дар Қазоқистон давоми 3 соли охир даҳҳо нафарро барои ширкат дар ҷанги Украина ба мӯҳлатҳои гуногун, аксаран то 5 сол, зиндонӣ кардаанд.

Дар Қирғизистон ва Узбекистон ба шахсоне, ки бо Русия қарордод бастаанд, ҷазои сабуктар пешбинӣ мекунанд ва аксарият ҷазои шартӣ гирифтаанд.

Ба фарқ аз кишварҳои ҳамсоя, дар Тоҷикистон касе "барои иштирок дар даргириҳои Украина" ба ҷавобгарии ҷиноӣ кашида нашудааст.

Моҳи августи имсол Ҳабибулло Воҳидзода, додситони кулли Тоҷикистон гуфт, "дар ҳоле ки шаҳрвандии ягон кишварро қабул мекунед, талабот ва ӯҳдадориҳои он давлатро бояд риоя кунед". Манзури ӯ тоҷикистониёне буд, ки шиносномаи русӣ гирифтаанд.

Ин дар ҳолест, ки дар гузоришу пажӯҳишҳо аз ҳузури садҳо ва кушта шудани даҳҳо зодаи Тоҷикистон дар ҷанг хабар дода шудааст.

Ба ҳисоби тарҳи давлатии "Зистан мехоҳам" (Украина) аз оғози соли равон беш аз 600 зодаи Тоҷикистон бо артиши Русия қарордод баста, ба ҷанг рафтаанд. Ин тарҳ дар маҷмӯъ номи 930 Тоҷикистониро нашр кард, ки ба ҷанг пайвастаанд ва тақрибан 200 нафарашон ҳам кушта шудаанд.

Ба гуфтаи муаллифони пажӯҳиш, аксарият аз зиндонҳо ва қисме ҳам аз сохтмону бозорҳо ба ҷанг сафарбар шудаанд. Ба ин роҳ онҳоро бо ваъдаи раҳоӣ аз зиндон, пули калон ва ё пешниҳоди шиносномаи русӣ ҷалб мекарданд.

Дар пайи ҳамлаҳо аз хоки Афғонистон ба шаҳрвандони Чин дар ду ноҳияи наздимарзии Тоҷикистон, ки панҷ кушта ва панҷ захмӣ барҷой гузошт, вазирони корҳои хориҷии Тоҷикистон ва ҳукумати "Толибон" телефонӣ суҳбат кардаанд.

Вазорати корҳои хориҷии "Толибон" рӯзи 2-юми декабр дар эъломияе навишт, ки Амирхон Муттақӣ ва Сироҷиддин Муҳриддин "ба идомаи тамоси нерӯҳои марзӣ, ҳамкориҳои амниятӣ ва баргузории нишастҳои кумитаҳои муштарак тавофуқ карданд".

Ҷониби Тоҷикистон дар мавриди ин тамоси телефонӣ то кунун ибрози назар накардааст.

Бар асоси изҳороти "Толибон", Муттақӣ ба Сироҷиддин Муҳриддин гуфтааст, ду кишвар ахиран фазои эътимод ва ҳамкориҳои сиёсӣ, иқтисодӣ ва амниятиро эҷод кардаанд, "аммо баъзе аз ҳалқаҳо талош доранд ба ин раванд осеб бизананд". Дар изҳорот ба ҳалқа ё гурӯҳҳое, ки мехоҳанд робитаҳои Тоҷикистону Афғонистонро халалдор кунанд, ишорае нашудааст.

Эъломияи Вазорати корҳои хориҷии ҳукумати "Толибон" мегӯяд, Муттақӣ гуфтааст, ки Аморати исломии Афғонистон (Толибон ҳукумати худро чунин меноманд), омодааст дар таҳқиқоти муштарак дар бораи раванди кушта шудани шаҳрвандони Чин дар хоки Тоҷикистон бо ин кишвар ҳамкорӣ кунанд.

Бар пояи хабарномае, ки "Толибон" нашр кардаанд, Тоҷикистон низ хоҳони ҳамоҳангӣ ва таъмини амнияти марзӣ бо "Толибон" шудааст.

Дар чаҳор соли пас аз ба сари қудрат омадани ҳукумати "Толибон" дар Афғонистон, бори аввал аст, ки дипломатҳои аршади Тоҷикистон ва гурӯҳи ҳоким дар Афғонистон дар ин сатҳ бо ҳам телефонӣ суҳбат мекунанд.

Дар як ҳафтаи охир аз хоки Афғонистон ба ноҳияҳои наздимарзии Тоҷикистон ду ҳамла анҷом шуда, панҷ шаҳрванди Чин кушта ва панҷ тани дигар захмӣ гаштаанд. Онҳо дар як корхонаи заршӯйӣ дар ноҳияи Шамсиддин Шоҳин ва ширкати роҳсозӣ дар ноҳияи Дарвоз кор мекарданд.

Владимир Зеленский, раисҷумҳури Украина аз Фаронса ба Ирландия рафтааст ва интизор меравад, ки дар порлумони ин кишвар суханронӣ кунад.

Зеленский баъд аз мулоқот бо Эммануэл Макрон, раисҷумҳури Фаронса дар Порис гуфт, барномаи сулҳ бисёр хуб аст, аммо баҳс дар мавриди вогузории сарзаминҳо барои Украина мавзуи бисёр печида ба шумор меравад.

Амрико дар талоши поёни ҷанги наздик ба чорсолаи Русия дар Украина аст ва дар ин робита як барномаи сулҳро ҳам пешниҳод кардааст.

Аз сӯи дигар, Стив Витткоф, намояндаи вижаи раисҷумҳури Амрико ба Маскав рафтааст ва интизор меравад, ки рӯзи сешанбе, 2 декабр, бо президенти Русия Владимир Путин мулоқот кунад.

Аз оғози соли равон то кунун ин шашумин мулоқоти Витткоф бо Путин аст.

Як муҳоҷири тоҷикро дар шаҳри Санкт-Петербург барои гуё дуруст шуморидани ҳамлаи маргбор ба "Крокус Сити Ҳол"-и Маскав боздошт кардаанд.

Қудрат Қурбонови 28-сола бо қарори додгоҳи "Октябрский" то 26-уми январи соли оянда ба ҳабс гирифта шудааст. Бино ба иттилои дафтари матбуоти додгоҳҳои шаҳри Санкт–Петербург, Қурбонов моҳи марти соли 2024 дар паёмрасони худ ба ҷонибдорӣ аз ҳамлагарони "Крокус" чанд шарҳ навиштааст. Ин амали ӯ "дуруст шумурдани терроризм" арзёбӣ шудааст.

Дафтари матбуоти додгоҳҳои Санкт–Петербург гуфтааст, нисбат ба Қурбонов барои "изҳороти ошкоро ва дуруст шуморидани идеологияи террористӣ, сафедкунии оммавии терроризм ва ё таблиғи он", парванда боз шудааст.

Хабаргузории русии ТАСС бо такя ба манбаъҳои худ дар сохторҳои ҳифзи ҳуқуқ навиштааст, Қурбонов шаҳрванди Тоҷикистон ва гуё ҷонибдори гурӯҳи террористии "Давлати исломӣ" ё ДОИШ будааст.

Назари Қудрат Қурбонов ва наздикони ӯ ба ин иттиҳом маълум нест. Ба иттилои додгоҳ, вай ба гуноҳи худ иқрор шудааст.

Моҳи марти соли гузашта як шаҳрванди дигари Тоҷикистон ҳам дар Санкт-Петербург барои нашри навори ҳамлаи "Крокус" дар Телеграм ва ҷонибдорӣ аз он дастгир шуда буд. Аз ӯ Баҳодур Зуҳуров ном бурданд, ки 26 сол доштааст.

Ҳамлаи маргбор ба "Крокус Сити Ҳолл"-и Маскав дар моҳи марти соли 2024 ба оғози маъракаи сартосарии саркӯбу фишор ва ихроҷи муҳоҷирони кории тоҷик аз Русия сабаб шуд. Муҳоҷирон мегӯянд, фишору саркуб ва боздоштҳо бо ҳар баҳона то ба ҳол идома доранд.

“Дар Тоҷикистон хатари аз даст додани пешрафтҳо барои коҳиши маргумир аз вируси норасоии масунияти бадан ё HIV вуҷуд дорад.” Мутахассисони UNAIDS ё Барномаи Созмони Милал дар мавриди мубориза бо ВИЧ/СПИД дар ин бора изҳорот додаанд. Гузориши онҳо рӯзи 30-юми ноябр нашр шуд.

Таваҷҷуҳ ба ин масъала имсол бо сабаби коҳиши маблағгузории барномаҳои мубориза бо ВИЧ/СПИД, ки як бахше аз корҳои Оҷонси рушди байнулмилалии ИМА ё USAID мебошад, боло гирифт.

Гузориши UNAIDS мегӯяд, қатъи маблағгузорӣ бештар ба кори созмонҳои иҷтимоие ба мисли Шабакаи занони гирифтори ВИЧ/СПИД ва ё “Спин Плюс” дар Тоҷикистон таъсир расондааст. “Ҳоло ин талошҳо таҳти хатар ҳастанд,” -- менависад UNAIDS.

Таҳмина Ҳайдарова, раиси Шабакаи занони гирифтори ВИЧ/СПИД дар Тоҷикистон гуфтааст, “мардум дар таҳлука афтодаанд. Агар хадамоти мо баста шавад, занони гирифтори HIV, оилаҳое бо кӯдакони гирифтори ин вирус... дигар ҷое барои муроҷиат кардан намеёбанд.”

Таҳмина Ҳайдарова ва Пӯлод Ҷамолов аз гирифториашон ба бемории ВИЧ/СПИД ошкоро суҳбат карда, барои ёрӣ ба ҳамқисматони худ созмонҳои иҷтимоӣ таъсис додаанд. Онҳо мегӯянд, талошҳои бисёрсола барои аз байн бурдани стигма ва ёрӣ ба гирифторони вирус метавонанд аз даст раванд.

Ҳайдарова мегӯяд, 97 дарсади занони олуда ба HIV дар Тоҷикистон ҳатто аз хешовандони наздиктарин бемории худро пинҳон медоранд. 64%-и онҳо гуфтаанд, ки бо сабаби доштани ин вирус “бо табъйизи ходимони тиб дучор шудаанд”.

Масалан, Шабакаи занони гирифтори ВИЧ/СПИД ба зане ёрӣ додааст, ки бо сабаби гирифториаш ба HIV дандонпизишке аз муолиҷаи дандони дардманди ӯ парҳез кардааст. Муроҷиати ин зан ва созмон ба додгоҳе дар Тоҷикистон барои тантанаи адолат мусоидат намуд.

Пӯлод Ҷамолов мегӯяд, дар натиҷа “ин нафарон танҳо ба созмону гурӯҳҳои мисли мо эътимод мекунанд. Мо бо кори худ ба мушкилтарин нуқтаҳое ба мисли зиндону деҳоти дурдаст дастрасӣ дорем. Бе иштироки мо ин мардум дар канор гузошта мешаванд”, -- мегӯяд Ҷамолов.

UNAIDS навиштааст, дар Тоҷикистон ҳарчанд мавридҳои маргумир аз HIV аз соли 2020 ду баробар кам шудааст, 60% маблағгузории барномаҳои ёрӣ дар ин кишвар ҳамоно аз донорҳои байнулмилалӣ вобаста мебошад. 20%-и ин маблағҳо то январи имсол тавассути барномаи PEPFAR таъмин мешуд, ки онро дар навбати худ USAID дастгирӣ мекард.

Мақомоти Тоҷикистон гуфтаанд, ки ҳатто коҳиши 10-20-дарсадии маблағгзуории барномаҳои мубориза бо СПИД боис ба афзоиши 135-дарсадии олудашавӣ ва 5% афзоиши мавридҳои марг бар асари ин беморӣ мегардад.

Соли ҷорӣ бори аввал ҳукумати Тоҷикистон маблағгузории 10%-и доруҳои зидди ретровирусиро ба ӯҳда гирифт, вале UNAIDS мегӯяд, “бидуни ёрии сармоягузорон, ҳукуматҳо ва шарикони байнулмилалӣ дастовардҳо метавонанд аз байн раванд.”

Хабаргузории “Азия-Плюс” бо такя ба Маркази ҷумҳуриявии мубориза бо СПИД навишт, дар Тоҷикистон то поёни сентябри соли ҷорӣ беш аз 13 ҳазор шахси олуда ба HIV сабт шудааст, ки беш аз 7 ҳазор нафари онҳо мард мебошанд.

Сафири Чин дар Тоҷикистон, Го Чжизюн, аз мақомоти Тоҷикистон хостааст, ки барои таъмини амнияти ширкат ва шаҳрвандони чинӣ “тамоми чораҳои заруриро биандешанд”. Дар ин бора вебсайти сафорати Чин дар Тоҷикистон рӯзи 1-уми декабр хабар дод.

Ба иттилои манбаъ, Чжизюн дар пайи ҳамла ба роҳсозони чинӣ дар ноҳияи Дарвоз “ба таври фаврӣ” бо вазири корҳои хориҷии Тоҷикистон Сироҷиддин Муҳриддин ва муовини аввали раиси КДАМ Фарҳод Камолзода гап задааст.

Дар баёнияи сафорати Чин омадааст, ки “Тоҷикистон ҳамлаи мусаллаҳона ба шаҳрвандони Чинро қотеона маҳкум намуда, изҳор дошт, ба талабҳои Чин аҳамияти калон медиҳад ва барои ҳимоят аз ширкату шаҳрвандони чинӣ билофосила чораҳои амниятиро тақвият медиҳад”.

Ҷониби Тоҷикистон дар мавриди тамоси сафири Чин ва ҷузъиёти гуфтугӯи онҳо хабар надодааст.

Дар ҳамин ҳол, сомонаи Global Times рӯзи якуми декабр навишт, ки дар муроҷиате тавассути шабакаи WeChat аз шаҳрвандони Чин дар Тоҷикистон хоста шудааст, сарҳади Тоҷикистону Афғонистонро тарк кунанд ва ё аз сафар ба онҷо худдорӣ намоянд.

Дар як ҳафтаи охир аз хоки Афғонистон ба ноҳияҳои наздимарзии Тоҷикистон ду ҳамла анҷом шудааст. Дар ҳарду ҳодиса панҷ шаҳрванди Чин кушта ва панҷ тани дигар захмӣ гаштаанд. Онҳо дар як корхонаи заршӯйӣ дар ноҳияи Шамсиддин Шоҳин ва ширкати роҳсозӣ дар ноҳияи Дарвоз кор мекарданд.

Нерӯҳои марзбонӣ, як ниҳоди вобаста аз Кумитаи давлатии амнияти миллии Тоҷикистон, ҳамла ба роҳсозони чиниро дар ноҳияи Дарвози вилояти Бадахшон тасдиқ кард ва онро "кори аъзои гурӯҳи мусаллаҳи террористӣ" номид, вале аз ҳеч созмоне ном нагирифт.

Радиои Озодӣ қаблан бо такя ба манобеаш гузориш дод, ки дар ҳамлае шоми 30-юми ноябр дар деҳаи Шодаки ноҳияи Дарвоз ду шаҳрванди Чин кушта шудаанд.

Нерӯҳои марзбонӣ дар изҳороте аз 1-уми декабр гуфт, дар ин ҳамла, ки "аз ҳудуди деҳаи Рузваяки вилояти Бадахшони Афғонистон сурат гирифт", ду коргари ширкати “China Road and Bridge Corporation” низ маҷруҳ гаштаанд.

“Ҷониби Тоҷикистон барои таҳкими сарҳади давлатӣ ва таъмини амнияти шаҳрвандони кишвар ва хориҷӣ чораҳои иловагӣ меандешад,” -- гуфта шудааст дар изҳорот. Маълум нест, чораҳои иловагӣ аз чӣ иборат хоҳад буд.

Мақомоти Тоҷикистон ҳамчунин аз ҳукумати “Толибон” дар Афғонистон хостаанд, ки “ҷиҳати таъмини амну субот дар хатти сарҳади давлатии ду кишвар ва дастгир намудани афроди ба ин амалҳои мудҳиш дастдошта тадбирҳои муассири саривақтӣ андешанд.”

Дар ҳамин ҳол, телевизиони “Тулуъ” ба нақл аз Эҳсонуллоҳ Комгор, сухангӯйи фармондеҳии Бадахшони Афғонистон, гуфтааст, ки дар пайванд ба ҳамла ба коргарони чинӣ ду нафар дастгир шудааст.

Дар як ҳафтаи охир ин ҳамлаи дувум аз хоки Афғонистон ба ноҳияҳои наздимарзии Тоҷикистон аст. Дар умум, ба иттилои расмӣ, дар ҳарду ҳодиса панҷ шаҳрванди Чин кушта ва панҷ тани дигар захмӣ шудаанд.

Аз ин пеш, шаби 26-уми ноябр, дар як ҳамла ба қароргоҳи як корхонаи заршӯйӣ дар ноҳияи Шамсиддин Шоҳини вилояти Хатлон, ки ба гуфтаи мақомот аз сӯи Афғонистон анҷом шуд, 3 шаҳрванди Чин кушта шуданд. Захмиҳо низ ҳастанд.

Баъди ба сари қудрат омадани "Толибон" заршӯӣ ва истихроҷи тило дар соҳили дарёи Панҷ зиёд шуд. Дар баробари шаҳрвандони Афғонистон чиниҳо ҳам дар он ҷо тило меҷӯянд ва гурӯҳе аз онҳоро ба далели убури ғайриқонунии марз боздошт ҳам кардаанд.

Нерӯҳои марзбонии Тоҷикистон гуфтааст, феълан “вазъ дар сарҳад ором ва зери назорат аст” ва ҳамзамон таҳқиқи ҳодисаҳо идома дорад.

Масъулони Шабакаҳои тақсими барқ бо фиристодани паёмак ба мардум, аз ҷумла сокинони Душанбе, ҳушдор додаанд, ки агар онҳо дар як вақт аз 4 киловат бештар барқ истифода баранд, интиқоли барқ ба хонаҳояшон барои 30 дақиқа ба таври худкор қатъ мегардад. Ин муроҷиат ба сокиноне рабт дорад, ки аз ҳисобгираки якфаза (220В) истифода мебаранд.

Аз мардум хоста шудааст, ки дар як вақт аз чанд дастгоҳи барқӣ, ба мисли уту (дарзмол), печҳо ва дастгоҳи ҷомашӯӣ истифода накунанд.

Мақомот зарурати кам кардани истифодаи барқро ба камшавии об дар дарёҳо рабт додаанд, ки ба гуфтаи онҳо ба ҳаҷми истеҳсоли он таъсир расондааст.

Шабакаҳои тақсими барқ дар паёмак ба сокинон гуфтааст, ин чораҳо муваққатӣ буда, барои сарфаи об роҳандозӣ шудаанд.

Ҳафтаҳои охир сокинони зиёде дар Душанбе аз мушкили бебарқӣ ва ҷорӣ шудани маҳдудият ё лимити шадид шикоят доранд. Дар бисёре аз ноҳияву минтақаҳои дигари Тоҷикистон сокинон мегӯянд, дар шабонарӯз ҳамагӣ 1-3 соат барқ доранд.

Дар як номаи дигар, ки бо имзои раҳбари Шабакаҳои тақсими барқ ба мақомоти зертобеи он фиристода шудааст, гуфта шудааст, ки барқ тавассути ҳисобкунакҳои ҳушманд "мувофиқи навбат ва бо тартиби муайян аз системаи биллингӣ хомӯш карда мешавад".

Дар ин нома, ки нусхаи он ба шабакаҳои иҷтимоӣ роҳ ёфт, дастур шудааст, ки барқи корхонаҳои давлатӣ ва идораҳои буҷавӣ аз соати шаши бегоҳ то оғози рӯзи корӣ қатъ шавад. Ҳушдор дода шудааст, ки дар сурати саркашӣ аз ин дастур, шахсони масъул ҷазо хоҳанд гирифт.

Вазорати мудофиаи Тоҷикистон аз пурра иҷро шудани нақшаи даъвати тирамоҳии сокинон ба артиш хабар дод.

Ин ниҳод рӯзи 29 ноябр бо нашри иттилоияе гуфт, нақшаи даъват дар вилоятҳо ва тамоми шаҳру ноҳияҳои кишвар пурра иҷро шудааст.

Даъвати тирамоҳии ҷавонон ба хидмати ҳарбӣ аз якуми октябри оғоз шуд.

Вазорат аз чанд вилояту ноҳия барои иҷрои пеш аз мӯҳлати нақша тавсиф кардааст. Ин ниҳод таъкид кардааст, ки бо талоши комиссияҳои даъватӣ ва корҳои тарғиботию ташвиқотӣ шумораи ҷавононе, ки ихтиёран ба Артиши мепайванданд, сол то сол зиёд мешавад.

Ин дар ҳолест, ки дар ин даъват ҳам шикоят аз сарбозшикор кам набуд. Сокинон аз шаҳру минтақаҳои кишвар аз "облава" ва фишори мақомот норозигӣ мекарданд ва чанд ҳодисаи бо зӯр ва маҷбурӣ ба хидмат бурдани ҷавонон ҳам ба шабакаҳо роҳ ёфт.

Аз ҷумла, дар моҳи октябри имсол наворе пурбаҳс шуд, ки ба гуфтаи муаллифаш, лаҳзаи "облава"-и як ҷавон дар шаҳри Кӯлоб аст.

Вазорати дифои Тоҷикистон дар вокуниш гуфт, ҳодиса сарбозшикор набуд, балки лаҳзаи боздошти як гумонбар дар фурӯши маводи мухаддир буд.

Аммо наздикони ҷавони боздоштшуда даст доштани ӯ дар фурӯши маводи мухаддирро рад карда буданд.

Намояндагони ҳизби Ҷабҳаи мардумӣ, созмони умдаи мухолиф дар Озарбойҷон, 30-юми ноябр иддао карданд, ки раҳбари ин ҳизб дастгир шудааст.

Онҳо гуфтанд, мақомот зимни амалиёт рӯзи шанбе хонаи ӯро дар шаҳри Боку кофтукоб карданд ва аз он замон ҷойи будубоши Алӣ Каримлӣ маълум нест.

Писари Маммад, як узви раёсати ҳизб, дар Фейсбук навиштааст, ки беш аз даҳ маъмури амниятӣ хонаи падари ӯро низ кофтукоб карданд. Турон Иброҳим афзудааст, “онҳо телефон ва компютерро гирифта, ба макони номаълум бурданд”.

Чанд узви дигари ҳизби Ҷабҳаи мардумӣ дар Озарбойҷон дар шабакаҳои иҷтимоӣ пиромуни таъқибу назорати бештар шикоят карданд.

Дар ҳамин ҳол, нерӯҳои амниятии Туркия Гултекин Ҳоҷибейлӣ, як фаъоли дигари сиёсии Озарбойҷон (узви Маркази ҳамоҳангсозии Шӯрои миллии нерӯҳои демократӣ)-ро дастгир карданд.

Ҳоҷибейлӣ шоми 28-уми ноябр дар суҳбат бо Радиои Озодӣ гуфт, ки ӯро дар Боздоштгоҳи Истанбул ҷойгир кардаанд. Дертар ҳамкоронаш гуфтанд, ӯро пайдо карда натавонистанд.

Расонаҳои тарафдори ҳукумати Озарбойҷон ва матбуоти дигар гузориш доданд, ки эҳтимол Истанбул хонум Ҳоҷибейлиро ба Боку таслим кунад.

"Гурӯҳи 24", ҷунбиши мухолифи ҳукумати Тоҷикистон, ки фаъолияташ дар ҳудуди кишвар мамнуъст, дар як моҳи охир се узви созмонро аз сафаш берун кардааст.

Масъулони созмон дар эъломияе Қурбоналӣ Орифов ва Мустафо Ҳаётовро ба "риоя накардани оиннома ва боло гузоштани манфиатҳои шахсӣ аз манофеи умумии ҷунбиш" гунаҳкор донистанд.

Ба иддаои онҳо, аввалӣ дар Иёлоти Муттаҳида ва дувумӣ дар Фаронса паноҳанда ҳастанд. Мустафо Ҳаётов дар вокуниш ба қарори Шӯрои сиёсии “Гурӯҳи 24” дар Фейсбук навиштааст, “ҳаргиз дар ин роҳи душвор ҳадафи шахсӣ надоштам. На мансаб мехостам, на шуҳрату салтанат."

Ин фаъоли “Гурӯҳи 24”-ро соли 2019 аз Лаҳистон (Полша) ронда буданд ва ӯ дар рӯзҳои аввали расиданаш ба Тоҷикистон дар наворе иддао кард, ки дар озодист. Дар бораи сарнавишти баъдияш иттилое дар даст набуд.

Қурбоналӣ Орифов дар саҳифааш дар Фейсбук ҳанӯз дувуми ноябр гуфтааст, ки “бо хоҳиши худ” аз сафи “Гурӯҳи 24” берун шуд: “Сабаби ин қарор на ихтилоф, балки танҳо дидгоҳи шахсӣ ва хоҳиши идомаи кори мубориза дар шакли озодтар аст. Мо ҳама як ҳадаф дорем, озодии миллат ва поёни зулм. Фақат роҳҳо ва шаклҳои муборизаи мо метавонанд гуногун бошанд."

Шӯрои сиёсии “Гурӯҳи 24” далели ихроҷи Туйчӣ Маллоев, узви дигари созмонро “хиёнат ба арзишҳо ва ҳадафҳои мубориза, ҳамкорӣ бо ниҳодҳои амниятии режими диктатории Раҳмон ва сафари ӯ ба шаҳри Душанбе” номидааст.

“Амали мазкур на танҳо бар зидди меъёрҳои дохилӣ, балки бар хилофи усулҳои асосии муборизаи сиёсӣ ва эътимоди аъзои ҳаракат мебошад,” – гуфта шудааст дар эъломияи созмони “Гурӯҳи 24”.

“Гурӯҳи 24” мегӯяд, яке аз қарорҳо рӯзи 10 ва дигаре рӯзи 12-уми ноябр содир шуд ва ин се нафар аз лаҳзаи тасдиқи қарор, “дигар намоянда ва узви ҳаракат нестанд ва ҳаракат масъули ягон амал, изҳорот ва фаолиятҳои минбаъдаи онҳо намебошад”.

Бори аввал нест, ки “Гурӯҳи 24” баъзе аз аъзои худро аз сафаш берун мекунад. Шӯрои сиёсии “Гурӯҳи 24” моҳи августи соли 2024 эълом кард, ки узвияти Убайдулло Носиров, машҳур ба Убайдулло Саидиро “бо сабаби пойбанд набудан бо оинномаи ҳаракат” бекор кард. Саидӣ даъво дошт, ки “ғайриқонунӣ” ронда шудааст ва дертар созмони "Ҷавонон барои эҳёи Тоҷикистон"-ро фаъол кард.

Фаъолияти “Гурӯҳи 24”, ҷунбиши мухолифи ҳукумати Тоҷикистон, ки соҳибкори норозӣ Умаралӣ Қувватов бунёд гузоштааст (худаш соли 2015 дар Туркия кушта шуд), бо қарори Додгоҳи олӣ дар Тоҷикистон “ифротгаро” ва “мамнуъ”-ст. Масъулонаш созмонро сиёсӣ ва фаъолияти онро дурусту қонунӣ медонанд. То ин дам бо гуноҳи пайравӣ аз “Гурӯҳи 24” даҳҳо нафар дар Тоҷикистон, Русия ва кишварҳои дигар боздошт ва бархе ба муддати дароз зиндонӣ шудаанд. Созмонро соҳибкор ва муҳандис Дилшод Шарифов раҳбарӣ мекунад.

Финландия эълон кард, ки сафораташро дар Афғонистон, Покистон ва Мянмар мебандад.

Вазорати корҳои хориҷии Финландия дар изҳороте аз 28-уми ноябр далелҳои ин иқдомро "дипломатӣ" номид ва гуфт, он дар соли 2026 ба иҷро хоҳад даромад.

Дар баёния аз ҷумла гуфта мешавад, "ин далоил ба дигар шудани вазъи сиёсии кишварҳо ва равобити андак ё маҳдуди тиҷоратӣ ва иқтисодии онҳо бо Финландия пайванд дорад."

Баъди ба қудрат расидани гурӯҳи "Толибон", бисёре аз кишварҳои аврупоӣ сафорату консулгариҳои худро дар Афғонистон бастаанд.

Вазорати амнияти дохилии Амрико як шаҳрванди Афғонистонро бо гумони таҳдиди таркондани биное дар Техас боздошт кардааст.

Тришиа Маклафлин, ёвари вазири амнияти дохилии ИМА, рӯзи 29-уми ноябр дар шабакаи иҷтимоии "X" (Твиттер) ӯро "Муҳаммад Довуд Алокозай" муаррифӣ кард.

Вай навишт, Алокозай дар як навор дар ТикТок таҳдид кардааст, ки биноеро дар минтақаи Fort Worth дар Техас хоҳад тарконд.

Маклафлин гуфт, ин гумонзад як рӯз қабл аз ҳамлаи Раҳмонуллоҳ Лаканвол, як шаҳрванди дигари Афғонистон, ба ду сарбози Горди миллии Амрико боздошт шудааст.

Лаканволро рӯзи 26-уми ноябр бо иттиҳоми тирандозӣ ба ду сарбози Горди миллии Амрико дар Вашингтон дастгир карданд.

Ин ҳодиса боис гардид, ки Амрико дархости муҳоҷирати афғонҳоро ба Иёлоти Муттаҳида боздорад.

Сафорати Амрико дар Тоҷикистон эълон кард, ки ба зудӣ дар бораи барномаи DV2027 ё даври навбатии озмуни "Green Card” маълумот дода мешавад. Ин ниҳод бо нашри баёнияе рӯзи 29-уми ноябр ба сокинон ҳушдор додааст, ки эҳтиёт кунанд ва ба “миёнаравоне, ки иддао доранд, сабтином... аллакай оғоз шуд” бовар накунанд.

Сафорат ҳамчунин аз оғози муборизаи ҳукумати Амрико бо қаллобӣ ва муҳоҷирати ғайриқонунӣ хабар додааст. Ба иттилои ин ниҳод, рӯзҳои наздик тариқи сомонаҳои расмии Иёлоти Муттаҳда дар бораи сабти дархост барои "Green Card" маълумот дода мешавад. Ин ниҳод таъкид кардааст, ки корбарон бояд фақат ба сомонаҳое бовар ва такя кунанд, ки дар охираш навиштаи ".gov" доранд.

Солҳои пеш озмун барои дархости "Green Card" дар аввали моҳи октябр эълон мешуд, вале имсол рӯзи дақиқи он маълум нест. Хоҳишмандони зиёде дар Тоҷикистон оғози сабтином барои корти сабзро интизоранд ва бо вуҷуди он ки санаи он маълум нест, аз пеш дар марказҳои махсуси хидматрасонӣ навбат гирифтаанд.

Амрико барои муҳоҷирон кишвари фурсатҳо ва ҷойи кору ояндаи хубе арзёбӣ мешавад, аз ин рӯ, аз ҳар гӯшаи дунё, аз ҷумла Тоҷикистон, бо ҳар роҳе талош мекунанд, ба ин кишвар бирасанд.

Аз Тоҷикистон соли гузашта наздики се ҳазор нафар барандаи лотерея шуданд.

Департаменти давлатии Амрико барои хоҳишмандони ширкат дар бахтозмоӣ ё лотереяи ҳаққи иқомат дар Амрико ё “Грин корт” бори аввал пардохти ҳатмие ба миқдори 1 доллар ҷорӣ намуд.

Дар ин ҳамлаи мусаллаҳона, ки шаби 26-уми ноябр ба қароргоҳи як корхонаи заршӯӣ дар ноҳияи Шамсиддини Шоҳин аз кишвари ҳамсоя анҷом шуд, 3 шаҳрванди Чин кушта шуда, як корманди дигари чинӣ дар ҷараёни тирандозӣ сахт захмӣ шудааст.

Бино ба навиштаи "Ройтерз" мақомоти Чин аз Душанбе хостаанд, ҳодисаро таҳқиқ кунад.

Чанде аз кишварҳо, аз ҷумла Вазорати умури хориҷии Эрон ҳамлаи маргбор дар марзи Тоҷикистону Афғонистонро теpрористӣ хонда, шадидан маҳкум карданд.

Бино ба навиштаи рӯзномаи “Кайҳон” Исмоил Бақоӣ, сухангӯйи Вазорати умури хориҷаи Эрон ба хонаводаи кушташудаҳо изҳорӣ ҳамдардӣ карда, ба ҳамбастагии Эрон бо ҳукуматҳои Тоҷикистон ва Чин таъкид кардааст.

Ин мақомдори эронӣ ба зарурати таҳкими ҳамкориҳои ҳамаҷониба барои мубориза бо чунин ҳамлаҳо ишора кардааст.

Вазорати умури хориҷии Покистон ҳам рӯзи 28-уми ноябр кушта шудани се шаҳрванди чинӣ дар Тоҷикистонро «ҳамлаи шариронаи террористӣ» ва таҳдиди ҷиддӣ бархоста аз хоки Афғонистон хонда, маҳкум кардааст.

Вазорат бо нашри як баёнияи расмӣ ҳамчунин ба ҳукумати Тоҷикистон ва Чин изҳори ҳамдардӣ ва ҳамраъй кардааст. Дар ин баёния омадааст, истифода аз паҳподҳои ҷангӣ дар ин рӯйдод, умқи таҳдид ва «ҷасорати гурӯҳҳое»-ро нишон медиҳад, ки дар дохили Афғонистон фаъолият мекунанд.

Вазорати умури хориҷии Покистон ҳамчунин гуфтааст, ки мардуми ин кишвар дарду ранҷи Чин ва Тоҷикистонро дарк мекунанд, зеро худ «борҳо қурбонии ҳамлаҳои террористӣ созмондиҳишуда аз хоки Афғонистон» шудаанд.

Толибони ҳоким дар Афғонистон ҳам бо нашри як баёнияе гуфтаанд, ки “ба хотири рӯйдоди ногувори кушта шудани се табааи кишвари Чин дар минтақаи Шамсуддин Шоҳин вилояти Хатлони Ҷумҳурии Тоҷикистон, ҳамдардии худро бo Ҷумҳурии Халқи Чин ва Ҷумҳурии Тоҷикистон иброз медорад ва ин рӯйдодро бо шадидтарин алфоз маҳкум мекунад.”

Дар баёнияи Ҳафиз Зиё Аҳмад, сухангӯи вазорати умури хориҷии Толибон, ки дар шабакаи иҷтимоии Х нашр шудааст, омадааст, “бар асоси арзёбии аввалия ва иттилоот ба дастомада аз ниҳодҳои амниятии Толибон дар ин рӯйдод доираҳое “даст доранд, ки барои эҷоди ошӯб, бесуботӣ ва доман задан ба беэътимодӣ миёни кишварҳои минтақа талош мекунанд.” Дар ин баёния аз ҳеч гурӯҳ, ё ҳалқае ном набурда, Толибон гуфтааст, бо ҳукумати Тоҷикистон дар шиносоии омилони ҳамла ҳамкорӣ хоҳад кард.

Вазорати умури хориҷии Тоҷикистон гуфт, ки шаби 26-уми ноябр дар натиҷаи ҳамлаи мусаллаҳона ба қароргоҳи як корхонаи заршӯӣ дар марзи Тоҷикистону Афғонистон дар ноҳияи Шамсиддини Шоҳин се коргари чинӣ кушта шуданд. Ба гуфтаи манобеи Радиои Озодӣ, яке дигар аз шаҳрвандони Чин дар ин ҳамла захмӣ шудааст.

Ба иттилои мақомоти тоҷик, ҳамла бо аслиҳаи оташфишон ва зоҳиран паҳпод ё дронҳои хурди қотил сурат гирифтааст. Вазорат ҳамларо қотеона маҳкум карда аз Толибони ҳоким дар Афғонистон хостааст, ҷиҳати таъмини суботу амният дар сарҳад “тадбирҳои муассир биандешад.”